Ei strand på Akerøya i Østfold er den mest forsøppla stranda i heile Europa.
Det er ein organisasjon som kallar seg for OSPAR som har målt kor mykje søppel som har ligge på stranda. OSPAR jobbar for å beskytte havet og dyra som lev der. 14 andre land i Europa er også med i OSPAR og målar søppel på strender andre plassar i Europa. Stranda på Akerøya er verst av alle strendene i Europa.
Over 22 000 bitar søppel vart funne her i fjor. Det er dobbelt så mykje som året før. Plast er det søppelet dei finn mest av.
Noko av søppelet kjem frå plassar sør i Europa, men mykje kan skuldast at folk ikkje bryr seg.
- Me har sett at folk kastar meir søppel enn for eit par år sidan, fortel Pål Bugge i Naturvernforbundet på Hvaler. Han synest det er veldig dumt og håpar folk kan skjerpe seg og plukke opp søppelet sitt.
- Det er så mykje søppel at det skadar miljøet og dyra som lev her, fortel han.
MYKJE SØPPEL: Så mykje søppel fann dei på Hvaler i fjor. Foto: Monika Olsen, Ytre Hvaler Nasjonalpark