Kvinnehopping sin store pioner, Anette Sagen (30), har ikkje lenger motivasjon til å drive med toppidrett.
– Det er så enkelt som at eg syns ikkje det er så artig å stå på toppen av ein hoppbakke lenger. Eg elskar sporten, men gleda ved å konkurrere er borte, seier Anette til NRK.
Ho har brukt store delar av sitt vaksne liv på å kjempe for at dei kvinnelege utøvarane i hopp skal få dei same rettane som dei mannlege.
– Ein lette
Kampen for å få dei same rettane er langt på veg ferdigkjempa. Uavhengig av det har Sagen mista motivasjonen til å drive med toppidrett.
– Utan motivasjon har eg ikkje det som må til for å vere best. Eg vil ikkje drive med dette dersom eg ikkje kan vere best, seier Anette.
– Korleis opplevast det?
– Det har vore ein prosess, men det går greitt no. Eg gler meg til å ta fatt på ein ny epoke i livet. Eigentleg var det ein lette då eg hadde tatt valet.
Ho seier avgjersla vart tatt då ho ikkje kom med på laget som deltok i VM i Falun.
– Men eg har nok eigentleg tenkt på dette lenge, litt umedviten, og visst at dette ville bli den siste sesongen, seier Anette.
– Korleis trur du du blir hugsa?
– Eg håper eg blir hugsa som ein som var god, og som gjorde mykje for sporten.
Anette Sagen vart hylla på Twitter av tidlegare kollega Johan Remen Evensen. Foto: Skjermdump
Har sett spor
Det er nemleg liten tvil om at Anette har sett sine spor som idrettsutøvar.
Ho sto i bresjen då kvinnene sette i gang kampen for å få hoppe verdscup, VM og OL.
– I det siste har det handla mest om å hoppe bra, men for ti år sidan var det meir. Då var det naudsynt å ta i eit tak dersom ein ville vere med, og det var jo det som var draumen, seier Anette.
Dei siste sesongane har Sagen slite med å finne forma.
Ho vart ikkje funne god nok då kvinnehopp sto på OL-programmet for første gong i 2014. Eit nederlag for Anette, som hadde kjempa i årevis for å få dette til.
Historia gjentok seg då ho ikkje kom med i troppen som deltok i årets VM.
Sjå den ein av dei første tv-reportasjane NRK lagde om Anette Sagen:
Denne artikkelen er henta frå nrk.no, og er skriven av Yasmin Sunde Hoel og Anders Engeland.