15 år gamle Noa Mintz, frå New York i USA, har gjort noko mange sikkert ikkje ein gong har drøymt om.
Ho tjente nemleg 480.000 dollar, altså 3,6 millionar kroner, i fjor på barnevakttenester.
Ville ha meir for pengane
Det er berre knappe 3 år sidan ho som 12-åring starta tenesta Nannies by Noa.
Ideen kom då ho sjølv var misnøgd med hennar eigen barnevakt, og meinte mora kunne få meir for pengane.
Deretter byrja ho å hjelpe alle vennane til mora å finne nye barnevakter.
– Eg syns det var kjekt å bli kjend med familiane, finne ut kva dei trong, og deretter finne ei passande barnvakt.
Mange tilsette
Faren hjelpte ho med å starte firmaet, sidan ho var mindreårig og trong litt økonomisk hjelp i starten. No kan ho derimot skryte av å ha 190 faste kundar, fortel den amerikanske nyhendekanalen CNN.
For å gi dei 190 kundane den hjelpa dei treng, har ho no 25 tilsette som er barnevakter på fulltid, og 50 barnevakter som jobbar deltid. I tillegg har ho no hovudkontoret sitt midt i Manhattan i New York.
I fjor tilsette ho 26 år gamle Allison Johnson til å hjelpe ho med å styre selskapet til dagleg. Noa hadde då jobba 40 timar i veka i tillegg til å gå på skule.
Barnevakttenesten til Noa har også ein profesjonell heimeside.
Tar ikkje ut løn
Sjølv om firmaet hennar no går så bra at ho tenar millionar på det, så har ho visst ikkje tatt ut noko særleg løn sjølv enda.
Fram til no har ho stort sett investert pengane på å utvide og reklamere for tenesten sin.
– Eg kjem nok til å ta ut løn etterkvart, men ikkje enda, fortel Noa.
Ho ser det heller ikkje på som umogleg at ho skiftar karriere etterkvart.
– Først må eg bli ferdig med ungdomskulen. Etter det kan det vere at eg startar opp andre firma, kven veit.
Sitt du barnevakt?